തൃശൂര്‍ ഗാന്ധിപീസ് ഫൗണ്ടേഷന്‍ ഹാളില്‍ വച്ച് മാര്‍ച്ച് 9 ന് NAPM വിളിച്ചു ചേര്‍ത്ത ഭക്ഷ്യ- ആരോഗ്യ സ്വരാജ് കൂടിയാലോചനയുടെ സംക്ഷിപ്തറിപ്പോര്‍ട്ട്
സണ്ണി പൈകട
സണ്ണി പൈകട
യോഗത്തില്‍ പങ്കെടുത്തവര്‍:
പി.ടി. എം ഹുസൈന്‍ (തൃശൂര്‍) കൃഷ്ണകുമാര്‍ ( പാലക്കാട്), ചെന്താമര ( പാലക്കാട്), ഡോ.ആര്‍.എം .പ്രസാദ് (തൃശൂര്‍), കെ.ജി.ജഗദീശന്‍ (ആലപ്പുഴ), കെ. ഗോപാലകൃഷ്ണന്‍ (തൃശൂര്‍), ജോര്‍ജ് മുല്ലക്കര (കോട്ടയം), റോണി. പി.മാത്യു (തൃശൂര്‍), തോമസ് കളപ്പുര (കണ്ണൂര്‍), സജി ജോസ് (കാസറഗോഡ്), പി.കെ.ലാല്‍ (കാസറഗോഡ്), ഇന്ദിര വി.എം (തൃശൂര്‍), റോബിന്‍ കേരളീയം (തൃശൂര്‍), കെ. സഹദേവന്‍ (കണ്ണൂര്‍), എന്‍ .പി. ജോണ്‍സണ്‍ (എറണാകുളം), കെ.പരമേശ്വരശര്‍മ്മ (തൃശൂര്‍), ഡോ. എം. പി. പരമേശ്വരന്‍ (തൃശ്ശൂര്‍), ജിയോ ജോസ് (എറണാകുളം), ജോബി വര്‍ഗീസ് (ആലപ്പുഴ), രാജീവ് മുരളി (ആലപ്പുഴ), ശ്രീജ ആറങ്ങോട്ടുകര (തൃശ്ശൂര്‍), നിപുണ്‍ വര്‍ഗീസ് (എറണാകുളം), ഡേവിസ് വളര്‍കാവ് (തൃശ്ശൂര്‍), സണ്ണി പൈകട (കാസറഗോഡ്).
അസൗകര്യം മൂലം യോഗത്തിന് എത്തില്ലെന്നും ഇക്കാര്യത്തില്‍ സഹകരണവും പങ്കാളിത്തവും ഉണ്ടാവുമെന്നും നിരവധിപേര്‍ അറിയിച്ചിരുന്നു.
യോഗത്തില്‍ ഉയര്‍ന്നു വന്ന പ്രധാന നിരീക്ഷണങ്ങളം അഭിപ്രായങ്ങളും ഇവയാണ് :
ഭക്ഷണം, ആരോഗ്യം, കൃഷി എന്നീ കാര്യങ്ങളെ കൂടുതല്‍ സമഗ്രതയോടെ നോക്കിക്കാണണം. ജനകേന്ദ്രീകൃതമായി ഇക്കാര്യം വികസിപ്പിച്ചുകൊണ്ടുവരാനുള്ള അനുകൂല സാഹചര്യം ഇന്ന് കേരളത്തിലുണ്ട്. ഭക്ഷണം കഴിക്കുന്നവരെല്ലാം ഭക്ഷ്യോല്‍പ്പാദനത്തില്‍ പങ്കാളികളാവണമെന്നത് കേരളത്തിന്റെ രാഷ്ട്രീയ മണ്ഡലത്തില്‍ ഉയര്‍ത്തേണ്ട മൗലികതയുള്ള മുദ്രാവാക്യമാണ്. കിഴങ്ങുവര്‍ഗത്തിനും ഇലക്കറികള്‍ക്കും പ്രാമുഖ്യം ലഭിക്കുന്ന ഭക്ഷണ സമീപനങ്ങള്‍ക്കാണ് ഇനി കേരളത്തില്‍ കൂടുതല്‍ സാധ്യതകള്‍. കോര്‍പ്പറേറ്റ് കൃഷി, ഭക്ഷണത്തെ വില്‍ക്കാനും വാങ്ങാനുമുള്ള ചരക്കായി കാണുന്ന സമീപനം തുടങ്ങിയവ ആപത്താണ്.
ഭക്ഷണം എത്ര അകലെനിന്നാണ് ലഭ്യമാകുന്നത് എന്നതിന്റെ മാനദണ്ഡമായി വിശേഷിപ്പിക്കപ്പെടുന്ന ഫുഡ് മൈല്‍ സങ്കല്പം കേരളീയ സാഹചര്യത്തില്‍ ഏറെ പ്രസക്തമാണ.് ഭക്ഷണകാര്യങ്ങളില്‍ മലയാളിക്കുമുന്നിലുള്ള അനിശ്ചിതത്വങ്ങളും ഇന്ധനനഷടമുള്‍പ്പെടെയുള്ളപാഴ്‌ചെലവുകളും വിലക്കയറ്റവും ഭക്ഷ്യവസ്തുക്കളുടെ ഗുണശോഷണവും ഫുഡ് മൈല്‍ സങ്കല്പത്തിന്റെ പശ്ചാത്തലത്തില്‍ വിലയിരുത്തപ്പെടണം.
കേരളത്തിന്റെ ഭക്ഷ്യോല്‍പ്പാദന പ്രവര്‍ത്തനങ്ങള്‍ക്ക് ഏറ്റവും വലിയ ഭീഷണി ഇവിടെ വളര്‍ന്നുവരുന്ന കെട്ടിട നിര്‍മ്മാണ വ്യവസായമാണ്. അവശേഷിക്കുന്ന പാടങ്ങള്‍ ഇല്ലാതാവുന്നതിനും ജലസ്രോതസ്സുകള്‍ നശിക്കുന്നതിനും ഭൂപ്രകൃതിയില്‍ത്തന്നെ വിനാശകരമായ രൂപമാറ്റങ്ങള്‍ ഉണ്ടാവുന്നതിനും കാലാവസ്ഥയില്‍ പോലും ഗുരുതരമായ പ്രത്യാഘാതങ്ങള്‍ ഉണ്ടാക്കുന്നതിനും ഈ വ്യവസായം കാരണമാവുന്നു. ലോണുകളുടെ ലഭ്യത ഭക്ഷണമുള്‍പ്പെടെയുള്ള ജീവിതശൈലിയേ രൂപപ്പെടുത്തുന്ന കാലഘട്ടമാണിത്. ഭക്ഷണവൈവിധ്യങ്ങള്‍ കാത്തുസൂക്ഷിക്കുന്നതിനുള്ള ജാഗ്രത ഭക്ഷ്യ-ആരോഗ്യസ്വരാജിന്റെ ഭാഗമാണ്.
ഭക്ഷണത്തിന്റെ സൗന്ദര്യാത്മകതലവും ഏറെ പ്രധാനമാണ്.
കര്‍ഷകര്‍ ഭക്ഷ്യോല്‍പ്പാദനരംഗത്തുനിന്ന് മാറി നില്‍ക്കുന്നതിന്റെ കാരണമന്വേഷിക്കണം. മറ്റ് രംഗത്തുള്ളവരുടെ ജീവിതസ്വപ്നങ്ങള്‍തന്നെ കര്‍ഷകര്‍ക്കുമുണ്ടാകുന്നത് സ്വാഭാവികമാണ്. കൃഷി അതിനുതകില്ലെങ്കില്‍ അവര്‍ മറ്റ് മാര്‍ഗങ്ങളന്വേഷിക്കുന്നതും സ്വാഭാവികമാണെന്ന് പൊതുസമൂഹം മനസ്സിലാക്കണം. സമൂഹത്തിന് നല്ല ഭക്ഷണം ഉല്‍പ്പാദിപ്പിച്ച് നല്‍കാനുള്ള ബാധ്യത കര്‍ഷകന്റെ മാത്രം ചുമലില്‍ വയ്ക്കരുത്. അഗ്രികള്‍ച്ചറല്‍ ഇന്‍ഡസ്ട്രി, ഫുഡ് പ്രോസ്സസ്സിംഗ് ഇന്‍ഡസ്ട്രി തുടങ്ങിയവ ഹെല്‍ത്ത് ഇന്‍ഡസ്ട്രിയിലേക്ക് വഴി തുറക്കുന്നവയാണ്, ആരോഗ്യത്തിന് ഭീഷണിയും.
ഇന്നത്തെ പാചകരീതികളെക്കുറിച്ച് പുനര്‍വിചിന്തനം ആവശ്യമാണ്. പാചകം ചെയ്യാത്ത വിഭവങ്ങള്‍ ഭക്ഷണത്തിലുള്‍പ്പെടുത്തേണ്ടതും പ്രധാനമാണ്.
കൃഷിയുടെ സംസ്‌കാരം വീണ്ടെടുക്കണം ജൈവകൃഷിരീതികളിലെ ചിലവൈരുദ്ധ്യങ്ങളും കിടമത്സരങ്ങളും പ്രശ്‌നങ്ങളുണ്ടാക്കുന്നുണ്ട്. ചക്കപോലുള്ള ഫലവര്‍ഗങ്ങള്‍ക്ക് പ്രാധാന്യം നല്‍കുന്ന ഭക്ഷണ സമ്പ്രദായമാവശ്യമാണ്. ഭക്ഷ്യ ഉത്പന്നങ്ങളും വിത്തുകളും ചൂഷണരഹിതമായി കൈമാറ്റം ചെയ്യാനുള്ള സംവിധാനങ്ങളു്ണ്ടാകണം. ഡിപ്പാര്‍ട്ടുമെന്റലിസത്തിന്റെയും കക്ഷിരാഷ്ട്രീയത്തിന്റെയും സ്വാധീനത്തില്‍പ്പെടാത്ത വിധത്തില്‍ ജനകീയമുന്‍കൈയില്‍ നിലനില്‍ക്കുന്ന ഓര്‍ഗാനിക് സഹകരണ സംരംഭങ്ങളെക്കുറിച്ചാലോചിക്കണം.
മൗലികവാദ സമീപനങ്ങള്‍ ഗുണം ചെയ്യില്ല. എല്ലാ സമ്പ്രദായങ്ങളോടും സംവാദാത്മകമായ തുറന്ന സമീപനം വേണം.
ഭക്ഷ്യ- ആരോഗ്യസ്വരാജ് സങ്കല്പം സംബന്ധിച്ച് ഹ്രസ്വകാലാടിസ്ഥാനത്തിലും ദീര്‍ഘകാലാടിസ്ഥാനത്തിലുമുള്ള പ്രവര്‍ത്തനപരിപാടികളാവശ്യമാണ്. ആശയതലത്തിലുള്ള അന്വേഷണങ്ങളും പ്രായോഗിക തലത്തിലുള്ള ഇടപെടലുകളും നിരന്തരമുണ്ടാവണം. ഇത്തരം കാര്യങ്ങളില്‍ ഗൗരവതര ചിന്തകളുള്ളവരുടെ ജില്ലാ- സംസ്ഥാനതലക്കൂടിച്ചേരലുകള്‍ ഇടയ്ക്കിടെ സംഘടിപ്പിക്കണം.
ഇനിയെന്ത്?
തൃശ്ശൂര്‍ യോഗത്തിന്റെ തുടര്‍ച്ചയായി അടുത്ത ചുവടുവയ്പ്പ് എന്താവണമെന്നതിനെക്കുറിച്ച് വിശദമായി ചര്‍ച്ച ചെയ്യാന്‍ സമയം ലഭിച്ചില്ലെങ്കിലും ഈ വിഷയവുമായി ബന്ധപ്പെട്ട പ്രവര്‍ത്തനങ്ങള്‍ നടക്കുന്ന സ്ഥലങ്ങളിലാവണം അടുത്ത കൂടിയാലോചനകള്‍ എന്ന് നിശ്ചയിക്കപ്പെട്ടു. അതനുസരിച്ച് തിരുവനന്തപുരം ജില്ലയിലെ ചപ്പാത്ത് കേന്ദ്രീകരിച്ച് പ്രവര്‍ത്തിക്കുന്ന ശാന്തിഗ്രാമില്‍ വച്ച് അടുത്ത കൂടിച്ചേരല്‍ നടത്താന്‍ തീരുമാനിച്ചു. ശാന്തിഗ്രാമിന്റെ
ആഭിമുഖ്യത്തില്‍ മൂന്നു പഞ്ചായത്തുകളില്‍ നടന്നു വരുന്ന ഭക്ഷ്യ- ആരോഗ്യ രംഗത്തെ ഇടപെടലുകളും തിരുവനന്തപുരത്തുള്ള കേന്ദ്ര കിഴങ്ങുവര്‍ഗ ഗവേഷണ കേന്ദ്രത്തിലെ പ്രവര്‍ത്തനങ്ങളും മനസ്സിലാക്കാനും ഉതകുന്ന വിധത്തില്‍ അടുത്ത കൂടിച്ചേരല്‍ നടത്താന്‍ നിശ്ചയിച്ചു.
തൃശ്ശൂര്‍യോഗത്തിലെ നിര്‍ദ്ദേശങ്ങള്‍കൂടി ഉള്‍പ്പെടുത്തിക്കൊണ്ട് കൃത്യമായ കര്‍മ്മപരിപാടികളുടെ ഒരു രൂപരേഖ അടുത്ത കൂടിച്ചേരലില്‍ ചര്‍ച്ചക്ക് വയ്ക്കാനും ഈ ആശയത്തിന്റെ ചുവടുപിടിച്ചുള്ള പ്രവര്‍ത്തനങ്ങളുടെ കോ-ഓര്‍ഡിനേഷന്‍ നടത്താനും ഡോ. എം. പി. പരമേശ്വരന്‍, ഡോ. ആര്‍. എം. പ്രസാദ്, തോമസ് കളപ്പുര, ശ്രീജ ആറങ്ങോട്ടുകര, രാജീവ് മുരളി, സണ്ണി പൈകട എന്നിവരെ ചുമതലപ്പെടുത്തിക്കൊണ്ടാണ് തൃശ്ശൂര്‍ യോഗം പര്യവസാനിച്ചത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ